Siamtu duang mihring

SIAMTU DUAN MIHRING Tetea Chhangte

Zanriah buhfai chhum tur leh chawhmeh tur ngaihtuah chawp ngai nitin lo tur hian eng ang fakauva thawhrim ngai mihring nge maw i nih chiah le ? tih hi sih chhum tham leka tawi kan thai kawi ve teh ang.

Mihring tung chho apiang zawng zawngte zinga mi hlawhtling reng reng te,mi pangngai dinhmuna ding leh vantlang chunglamte hian an dinchhuaha mihlawhtling nitura sul am sutna kham leh suar hringnun kawngah hian an kawng zawh reng reng hi anuam phar phar,a awlsam lam leh ahlimhlawp lam ani ngai lem lo ani.Mizote hi hnam inpawhtlang,titi ho nuam ti leh ahuho a inpawlkhawm hnam nunphung thisena bettlat neitu kan ni a,he kan hnamin a ken teltlat kan nihphung hi thilhlu rotling a ni e pawh ti ila kan tisual tam pui lawng chu maw.Nimahsela he kan in aikhawm dial dial thin na hi mi alo dinchhuaha,a thiltih kawnga mihlawhtling nitur chuan kalsan ngam a,mahni chauha kawngtum zawh angai fo thin ani.

‘NGHAL RUAL ZINGA NGHALCHANG TUR CHU ATLA FAL THIN’
A huho zinga filawr bik nitur chuan fianrial nun neih angai ve fova,abik takin zirlaite leh thiambil zirtute tan ahuhova in awm tlei dial dial a,khik vur vurna hmun atang chuan dingkhawchhuak tura tangfat pawhin hlawhchhamna hian min lo hmuak leh zawk fo thin ani.Engvang nge?Tu mawh nge ni ta ang le?
Khawvela thil tangkai tak tak thenkhat phei chu atel lova kan awm theih tawh loh khawpa thil pawimawh hrang hrang hmanrua siamchhuaktuten hman tangkai chi hrang hrang an hmuhchhuahna kawng kan thlirsak pheichuan mipui zinuai nuai karah leh hlimhlawp bawlna hmunah ani ngai mang lova,hlawhtlingna an hmuh fo thinna chu mi awmlohna hmunah mahni chauha tlafala an ngaihtuahna sawrbinga,hunawl awm lek lova an inserh hrangnaah hlawhtlingna pum hmawm thei turin thilthar an hmuchhuak fo thin ani.
Zelthelna leh dawngdahna hian kan nih dantur ni alang min nihphak tir lo fova,dinhmun hnuaihnung chhe zawkah beidawng takin min siam fova,khawvel eng hmu ngamlo leh nun thlakhlelhna pawh nei lovin mihring hi min awm tir fo thin ani.Mihringte hi hlawhtling tur hian keimahniah hian theihnate,ngaihruat theihnate,chhuidawn thiamna te,hriatthiam theihnate,thawk thei tura chakna leh beiseinate min pe ani.Hengte hi haichhuak turin phumrukin nangmahah khan a awm vek ani.A tumte leh ati tang tangte,hreawm tuar peih leh hlimhlawp nawmna pumpelhtute chuan an lo haichhuak tawh thin a,mi pangngai kan tih chunglam leh mi awhawm kan tih dinhmunah an lo in hlangkai tawh thin ani.
Hlawhtlingna hmu tura mihringa rohlu inphum chu hahdam tak leh nuamsa taka thawhchhuah chi erawh ani bau lova,i theihna hmang khan midang aia i thawhrim fal peih leh peih loh,duh leh duh loh ah a innghat ta a,i hlawhchhamnaah midang mawhpuh thei lovin hlawhtlinna chu nangma kutzal ngei a thawkchhuak tura Siamtun a duan mihring ilo ni e.
x